Адсутнасць рэзерваў і іншыя праблемы РФ у Луганскай вобласці, страты бакоў на Данбасе. Галоўнае са зводак

20 лютага 2023 у 1676897940
«Зеркало»

У Міністэрстве абароны Расіі заявілі пра захоп яшчэ аднаго пасёлка ў Данецкай вобласці. Ва ўкраінскім Генштабе паведамілі, што РФ засяродзілася на вядзенні наступальных дзеянняў на Купянскім, Ліманскім, Бахмуцкім, Аўдзееўскім і Шахцёрскім кірунках. У амерыканскім Інстытуце па вывучэнні вайны лічаць, што Расіі не хапае рэзерваў для павелічэння маштабаў свайго наступу ў Луганскай вобласці.

Расказваем пра галоўнае са зводак штабоў і высноваў экспертаў на 362-і дзень вайны ва Украіне.

Генштаб УСУ: адбілі атакі праціўніка ў раёнах сямі населеных пунктаў

Расійскія войскі працягваюць знішчаць крытычную інфраструктуру Украіны, наносіць удары па цывільных аб'ектах і дамах мірных грамадзян. Пра гэта паведамляе Генеральны штаб УСУ ў ранішняй зводцы.

- За мінулыя суткі расійскія войскі нанеслі 10 ракетных і 25 авіяцыйных удараў, правялі 62 абстрэлы з рэактыўных сістэм залпавага агню. Ёсць параненыя і загінулыя сярод цывільнага насельніцтва.

- На Валынскім, Палескім, Северскім і Слабажанскім напрамках абстрэлам падвергліся раёны 12 населеных пунктаў; на Купянскім і Ліманскім - 14; на Бахмуцкім напрамку абстрэлам падвергліся 10 населеных пунктаў, у раёне Бахмута для нанясення ўдару расіяне задзейнічалі ваенную авіяцыю; на Аўдзееўскім і Шахцёрскім напрамках расійскія войскі абстралялі з артылерыі 17 населеных пунктаў; на Запарожскім напрамку агнявому паражэнню падвергліся раёны 10 населеных пунктаў; на Херсонскім напрамку агнявому ўздзеяннб падвергліся Херсон і яшчэ чатыры населеныя пункты - пацярпелі мірныя грамадзяне.

- Праціўнік працягвае засяроджваць асноўныя намаганні на вядзенні наступальных дзеянняў на Купянскім, Ліманскім, Бахмуцкім, Аўдзееўскім і Шахцёрскім напрамках.

- Падраздзяленні Сіл абароны адбілі расійскія атакі ў раёнах населеных пунктаў Гранікаўка Харкаўскай вобласці; Белагораўка Луганскай вобласці; Васюкоўка, Дубова-Васільеўка, Бярхоўка, Бахмут і Іванаўскае Данецкай вобласці.

- Авіяцыя Сіл абароны Украіны за мінулыя суткі нанесла 20 удараў па раёнах канцэнтрацыі асабовага складу і ваеннай тэхнікі расійскіх сіл, сем - па зенітна-ракетных комплексах на агнявых пазіцыях, а таксама яшчэ два ўдары - па іншых важных аб'ектах праціўніка.

- Збіты расійскі самалёт Су-25, два беспілотныя лётныя апараты тыпу «Арлан-10» і два дроны-камікадзэ тыпу «Ланцэт-3».

- Падраздзяленні ракетных войскаў і артылерыі пабілі батарэю рэактыўных сістэм залпавага агню праціўніка.

У Генштабе таксама заявілі, што на акупаваных расійскімі войскамі тэрыторыях працягваецца ціск на цывільнае насельніцтва. «У асобных населеных пунктах Херсонскай вобласці захопнікі абсталёўваюць месцы ў адміністрацыйных будынках для незаконнага ўтрымання грамадзян Украіны, якіх падазраюць у супрацоўніцтве з Сіламі абароны і за праўкраінскую пазіцыю», - паведамілі ў ведамстве.

Мінабароны РФ: збілі ўкраінскі Су-27 у раёне Ізюма

У Міністэрстве абароны Расіі заявілі, што за суткі нанеслі ўдары па жывой сіле і тэхніцы УСУ ў 124 раёнах.

- На Купянскім напрамку агнём артылерыі і актыўнымі дзеяннямі падраздзяленняў «Заходняй» групоўкі войскаў нанесенае паражэнне жывой сіле і тэхніцы праціўніка ў раёнах населеных пунктаў Навасёлаўскае Луганскай вобласці, Масютаўка і Крахмальнае Харкаўскай вобласці. За суткі на гэтым напрамку знішчаныя да 50 украінскіх вайскоўцаў, адзін танк і тры аўтамабілі.

- На Чырвона-Ліманскім напрамку ў выніку ўдараў авіяцыі, агню артылерыі і цяжкіх агнямётных сістэм групоўкі войскаў «Цэнтр» у раёнах населеных пунктаў Ямполаўка Данецкай вобласці, Стальмахоўка і Чырвоная Дзіброва Луганскай вобласці, знішчаныя да 100 вайскоўцаў УСУ, дзве баявыя браніраваныя машыны, дзве гаўбіцы Д-30, а таксама радыёлакацыйная станцыя контрбатарэйнай барацьбы AN/TPQ-37.

- На Данецкім напрамку падчас паспяховых наступальных дзеянняў добраахвотнікі штурмавых атрадаў ва ўзаемадзеянні з падраздзяленнямі ПДВ, пры агнявой падтрымцы ракетных войскаў і артылерыі «Паўднёвай» групоўкі войскаў захапілі населены пункт Параскавіеўка Данецкай вобласці. За суткі на гэтым напрамку УСУ страцілі звыш 115 вайскоўцаў, баявую машыну пяхоты, тры баявыя браніраваныя машыны, два аўтамабілі, дзве ўстаноўкі РСЗА «Град», гаўбіцу Д-30, супрацьтанкавую гармату «Рапіра», а таксама радыёлакацыйную станцыю контрбатарэйнай барацьбы AN/TPQ-36.

- На Паўднёва-Данецкім і Запарожскім напрамках авіяцыя і артылерыя групоўкі войскаў «Усход» нанеслі комплекснае агнявое паражэнне падраздзяленням УСУ ў раёнах населеных пунктаў Вуглядар, Дабраволле Данецкай вобласці, Гуляйполе і Юркоўка Запарожскай вобласці. Страты УСУ за суткі на гэтых напрамках склалі да 60 вайскоўцаў, адзін танк, дзве баявыя браніраваныя машыны, гаўбіца Д-20 і дзве гаўбіцы Д-30. Акрамя таго, знішчаныя тры склады боепрыпасаў УСУ ў раёнах населеных пунктаў Малінаўка Запарожскай вобласці, Вуглядар і Вадзяное Данецкай вобласці.

- На Херсонскім напрамку ў выніку агнявога паражэння за суткі знішчаныя самаходная гаўбіца «Акацыя», буксаваная гармата «Гіяцынт», самаходная гаўбіца «Гваздзік» і тры гаўбіцы Д-30. Таксама ў раёне горада Херсон нанесены ўдар па складзе боепрыпасаў УСУ.

Усяго за суткі, паводле МА РФ, авіяцыяй, ракетнымі войскамі і артылерыяй Узброеных сіл РФ пабітыя 98 артылерыйскіх падраздзяленняў УСУ, а таксама жывая сіла і тэхніка ў 124 раёнах. У раёне горада Ізюм Харкаўскай вобласці ў паветраным баі быў збіты самалёт Су-27 Паветраных сіл Украіны. Сродкамі СПА перахоплены адзін рэактыўны снарад сістэмы залпавага агню HIMARS, знішчаныя 15 беспілотных лётных апаратаў.

Інстытут па вывучэнні вайны: у Расіі недахоп танкаў і рэзерваў

Асноўная фаза расійскіх наступальных аперацый ідзе ў Луганскай вобласці. Расіі, імаверна, не хапае свабодных рэзерваў, каб рэзка павялічыць маштабы або інтэнсіўнасць наступлення гэтай зімой. Пра гэта гаворыцца ў свежай справаздачы Інстытута па вывучэнні вайны.

Расійскія сухапутныя войскі, як правіла, дзейнічаюць у складзе звычайных фарміраванняў і частак, а не ў складзе батальённых тактычных груп або іншых спецыяльных структур. Назіраецца таксама недахоп тэхнікі, асабліва танкаў, якія былі страчаныя падчас папярэдніх няўдалых наступальных аперацый. Расійскія сілы амаль напэўна ўсё яшчэ маюць у рэзерве некалькі перафармаваных механізаваных частак, але ўвод іх на перадавую ў Луганскай вобласці наўрад ці радыкальна зменіць ход гэтага наступлення, мяркуюць у ISW.

Эксперты адзначаюць, што стан расійскіх сіл адчувальна пагоршыўся, вылучаецца недастаткова часу для навучання мабілізаваных рэзервістаў, не хапае абсталявання і экіпіроўкі, каб яны маглі весці буйнамаштабную наступальную манеўраную вайну.

У ISW таксама адзначаюць перакідванне ў Луганскую вобласць пераважнай колькасці падраздзяленняў войска РФ, у той час як у рэзерве практычна нікога не засталося. Гэта, на думку экспертаў, сведчыць пра тое, што наўрад ці можна чакаць зменаў у наступальных магчымасцях расіян.

Адзначаюць у Інстытуце і велізарныя страты ў расійскіх танкавых войсках, заяўляючы, што яны эквівалентныя прыкладна 16 палкам. Для аднаго танкавага палка патрабуецца трохі менш за 100 танкаў, таму для аднаўлення цалкам разгромленым у верасні 12-му і 13-му танкавым палкам патрабуецца 200 танкаў, якіх расійскія ўзброеныя сілы, відаць, не маюць і не здольныя хутка вырабіць. Паўсюдныя страты танкаў таксама ўплываюць на здольнасць мотастралковых фарміраванняў эфектыўна дзейнічаць. Усё гэта пазбаўляе расійскія сухапутныя сілы таго ўдару, які неабходны для ажыццяўлення і выкарыстання важных у аператыўным плане прарываў, адзначаюць эксперты.

Схема разгортвання расійскіх войскаў на іншых участках тэатра ваенных дзеянняў пераканаўча сведчыць пра тое, што большасць даступных манеўраных элементаў расійскіх ваенных акругаў і паветрана-дэсантных войскаў ужо задзейнічаныя, і, такім чынам, у Масквы няма вялікага рэзерву, які яна магла б раптоўна кінуць у бой у Луганскай вобласці або дзесьці яшчэ, кажуць у ISW.

На што яшчэ звярнулі ўвагу эксперты:

• расійскія войскі працягвалі наступальныя дзеянні на паўночны захад ад Сватава і ў раёне Крамянной. Расійскія крыніцы сцвярджаюць, што ўкраінскія сілы ўмацоўваюць перадавыя пазіцыі на захад і паўночны захад ад Крамянной;
• расійскія войскі, імаверна, дамагліся нязначных поспехаў у паўночных прыгарадах Бахмута і на ўсходніх ускраінах горада;
• паведамляецца, што расійскія сілы працягвалі наступальныя аперацыі на заходняй ускраіне Данецка і ў раёне Вуглядара.