Следчы камітэт 12 студзеня пачаў працэс спецыяльнай вытворчасці ў дачыненні да прадстаўніка аб’яднання былых беларускіх сілавікоў BYPOL Станіслава Лупаносава. Пра гэта паведаміла прэс-служба СК.
Адпаведнае рашэнне ўзгодненае генеральным пракурорам Рэспублікі Беларусь.
Дзеянні Станіслава Лупаносава кваліфікаваныя па трох артыкулах Крымінальнага кодэкса:
- 352 (Несанкцыянаванае капіяванне інфармацыі, якая захоўваецца ў камп’ютарнай сістэме, сетцы і на машынных носьбітах, што пацягнула нанясенне істотнай шкоды — да двух гадоў пазбаўлення волі),
- ч.1 арт. 356 (Здрада дзяржаве — ад сямі да пятнаццаці гадоў пазбаўлення волі),
- ч.3 арт. 426 (Перавышэнне ўлады ці службовых паўнамоцтваў, учыненае з карыслівай і іншай асабістай зацікаўленасці, што пацягнула цяжкія наступствы — ад трох да дзесяці гадоў пазбаўлення волі).
Станіслаў Лупаносаў — сузаснавальнік BYPOL, які менш за год адпрацаваў у 4-м упраўленні ГУБАЗіК, а да гэтага — чатыры гады ва ўпраўленні К МУС (там раскрываюць кіберзлачынствы).
Што такое спецыяльная вытворчасць
Як тлумачаць на сайце СК, «спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Рэспублікі Беларусь і ўхіляецца ад яўкі ў орган, які вядзе крымінальны працэс».
Разам з абвяшчэннем пра адкрыццё спецыяльнай вытворчасці СК выклікае фігурантаў у Беларусь для правядзення следчых дзеянняў — публікацыя гэтай інфармацыі на сайце ведамства паводле цяперашняга закона лічыцца належным паведамленнем. Усіх іх чакаюць у Мінску ў Цэнтральным апараце СК на вуліцы Фрунзе, 19.
Нагадаем, Аляксандр Лукашэнка ў ліпені падпісаў закон пра змены ў Крымінальна-працэсуальны кодэкс, якія дазваляюць судзіць беларусаў, якія знаходзяцца за мяжой, завочна і нават асуджаць іх на расстрэл.
Як паказала практыка, правядзенне папярэдняга расследавання ў парадку спецвытворчасці займае няшмат часу.
