Аляксандр Лукашэнка на агульным сходзе Белкаапсаюза 16 лютага расказаў пра «затрыманне дыверсантаў» на мяжы з Украінай.
— Толькі сёння затрымалі некалькі дыверсантаў на ўкраінскай мяжы. З дапамогай дронаў, па балотах некаторыя з украінскіх грамадзян перапаўзалі на нашую мяжу, перакідвалі выбухоўку для ажыццяўлення дыверсій перш за ўсё на тэрыторыі Расіі і Беларусі. Толькі што скончылася контртэрарыстычная аперацыя, якой вы не заўважылі. Гэта добра. Гэта не вашая справа. Вы павінныя спакойна рабіць сваю працу. Толькі што чэкісцка-вайсковая аперацыя завяршылася. Затрыманыя былі ўсе дыверсанты. А сярод іх і беларусы. І гэта практычна два-тры разы на тыдзень. Мы можам супакоіцца? Не можам. І нам — і мне, і ўладзе — вельмі важныя падтрымка і маналіт усіх нас і нашага народа. Мы кіраўнікі, ад нас усё залежыць. Будзем мы адзіныя і маналітныя — будзе і народ адзіным і маналітным, — сказаў Лукашэнка.
Палітык падкрэсліў, што «ўсё больш жорстка ставіць задачы перад міністэрствамі і патрабуе аддачы ад кадраў», каб «не дапускаць паслаблення, у тым ліку з улікам абстаноўкі вакол краіны».
— Вы бачыце, што адбываецца навокал. Але, прабачце мне, вы яшчэ не ўсё ведаеце. Скажу вам асноўнае, не канкрэтызуючы. Хутка мы вам паведамім па ўсіх гэтых пытаннях. Сёння ўсе хочуць на Захадзе, і ў авангардзе нашыя беларускія збеглыя (у дачыненні да Беларусі, што тычыцца), паразы Расіі ў вайне з Украінай, — адзначыў Лукашэнка.
Развіваючы сваю думку, палітык заявіў, што яму паказалі нейкую «цытату перамоваў» неназваных людзей з «асобнымі людзьмі на Захадзе». У гутарцы нібыта згадвалася, што «Польшча мае права на заходнія землі Беларусі, а ў выпадку паразы Расіі Беларусь будзе прырастаць за кошт заходніх земляў Расіі».
— Чытай, нам прырэжуць нешта са Смаленскай, Бранскай, можа, Пскоўскай абласцей. А Заходнюю Беларусь мы павінныя (да Мінска, як вы ведаеце, мяжа была) аддаць Польшчы. Гэта новыя «дэмакратычныя ўлады вядуць перамовы» на Захадзе, — растлумачыў Лукашэнка, адзначыўшы, што не прэтэндуе «ні на Вільню, ні на Беласточчыну, ні на расійскія, ні на ўкраінскія землі».
Нагадаем, у Лельчыцкім раёне 15 лютага ўвялі рэжым контртэрарыстычнай аперацыі. Пра гэта паведамілі мясцовыя ўлады са спасылкай на ўпраўленне КДБ па Гомельскай вобласці.
Насельніцтва раёна папрасілі захоўваць спакой і падпарадкоўвацца патрабаванням супрацоўнікаў сілавых структур.
У Лельчыцкім райвыканкаме, куды журналістка «Люстэрка» патэлефанавала як занепакоеная жыхарка, паведамлялі, што гэта вучэбная трывога.
— МНС паведамленні адправілі, што трэба быць пільнымі і не палохацца сірэны. Пакуль усё ў звычайным рэжыме, — расказалі па тэлефоне. — У нас жа ўжо не ўпершыню такое — праводзяць вучэнні перыядычна. Часам загадзя ведаюць, часам стыхійна да нас прыязджаюць, правяраюць, як мы гатовыя — гарадскія службы РАУС, РАНС. У нас пакуль усё ў звычайным рэжыме, усе працуюць. А яны там правяраюць, ці атрымліваюць людзі абвесткі.
Чытайце таксама
