Кіраўнік Цэнтра выдачы асабістых дакументаў Літвы (ADIC) Нерыюс Рудайціс адхілены ад пасады пасля расследавання пра пашпарты Новай Беларусі, паведамляе БРЦ са спасылкай на літоўскае выданне 15min.lt.
Раней падчас расследавання высветлілася, што літоўская кампанія Garsų pasaulis, якая друкавала бланкі дакументаў для грамадзян Літвы і абраная для друку пашпартоў Новай Беларусі, звязаная з фірмай GP Holographics і беларускім бізнесоўцам Віктарам Шаўцовым, набліжаным да Лукашэнкі.
Garsų pasaulis ужо была ўцягнутая ў карупцыйныя скандалы ў Кыргызстане, Дэмакратычнай Рэспубліцы Конга і Малдове. Цяпер праверку ў дачыненні да яе вядуць адначасова Служба па расследаванні фінансавых злачынстваў і Дэпартамент дзяржаўнай бяспекі Літвы.
«Вынікі праверак могуць прывесці да анулявання кантракту Garsų pasaulis з літоўскім МУС. З 2014 года кампанія выйграла ўсе тры тэндары на выраб бланкаў пашпартоў у Літве, апошні з якіх быў у 2022 годзе на суму больш чым 30 млн еўра», — паведамляе БРЦ.
Паводле намесніцы міністра ўнутраных справаў Літвы Агнеты Ладэк, у выпадку скасавання кантракту з Garsų pasaulis МУС разгледзіць альтэрнатыўныя варыянты друку дакументаў і ўлічыць досвед Польшчы і Германіі, дзе пашпарты вырабляюць дзяржаўныя кампаніі.
Чытайце таксама
