Аляксандр Лукашэнка даў згоду на прызначэнне кіраўнікоў трох буйных кампаній, перадае прэс-служба палітыка.
Валерый Кавалёў зойме пасаду генеральнага дырэктара ДВА па паліве і газіфікацыі «Белпалівагаз». Дагэтуль ён працаваў тут жа намеснікам гендырэктара.
Марат Малецкі ўзначаліць ЗАТ «Беларуская нафтавая кампанія». Раней ён займаў пасаду дарадцы дырэктара па арганізацыйных пытаннях ТАА «Лагістык Энерджы».
Андрэй Дзямідавец заняў пасаду генеральнага дырэктара ААТ «Мінск Крышталь» — кіраўнічая кампанія холдынгу «Мінск Крышталь Груп». Раней ён займаў пасаду гендырэктара ААТ «Гомельскі лікёра-гарэлачны завод „Радамір“».
Падчас узгаднення кандыдатуры генеральнага дырэктара ЗАТ «Беларуская нафтавая кампанія» Лукашэнка падкрэсліў, што ў гэтай структуры «працуюць прафесіяналы сваёй сферы», але на гэты момант яны «недастаткова загружаныя».
— Яны, мне здаецца, недазагружаныя ў гэтай кампаніі. Шкада гэтых спецыялістаў. Ведаю, што там вельмі добрыя спецыялісты, — сказаў ён. — Нам трэба моцна вызначацца з Беларускай нафтавай кампаніяй. Яна мусіць быць загружаная пад завязку. Калі не, значыць, гэтыя спецыялісты павінныя працаваць па спецыяльнасці па ўсёй краіне.
Звяртаючыся да Марата Малецкага, чыю кандыдатуру палітык узгадніў на пасаду гендырэктара БНК, Аляксандр Лукашэнка даручыў:
— Табе разам з урадам і Дзмітрыем Мікалаевічам (Крутым, кіраўніком Адміністрацыі прэзідэнта. — Заўв. рэд.) трэба дакладна вызначыцца — быць ці не быць гэтай кампаніі. А для таго каб быць, трэба фронт працы пэўны. Я думаю, вызначыцеся.