Грамадзянка Украіны заязджала з Польшчы ў Беларусь на аўтобусе праз Брэст і везла з сабой буйную суму. Але далей за мытню правезці не ўдалося, і сваіх грошай жанчына больш не ўбачыць. Падрабязнасці сталі вядомыя з пастановы суда.
Жанчына ў снежні 2023 года з’ехала з Украіны разам з мужам да сваякоў. У студзені 2024-га яна адна паехала на радзіму, каб прадаць дом і аўтамабіль, якія там засталіся. А ў канцы лютага вярталася да мужа праз Беларусь і везла з сабой атрыманыя ад продажу грошы і ўсе астатнія зберажэнні сям'і. Усяго ў яе было 25 735 даляраў, 375 еўра, 2600 расійскіх рублёў, 5 беларускіх рублёў і 11 грыўняў — у эквіваленце гэта амаль 26,2 тысячы даляраў.
Украінка была ў курсе, што сумы, большыя за 10 000 даляраў, трэба дэклараваць, але дзе і як гэта рабіць, не ведала: яна заязджала ў Беларусь другі раз у жыцці і ўпершыню — з грашыма. Выйшаўшы ноччу з аўтобуса на прапускным пункце, яна, як і мінулым разам, пайшла разам з астатнімі пасажырамі ў чаргу на зялёны калідор.
Да жанчыны падышоў супрацоўнік мытні і спытаў, ці ёсць у яе грошы для дэкларавання. Яна адказала сцвярджальна і паведаміла, што вязе больш за 20 000 даляраў, сама паказала купюры. Украінку адвялі ўбок, пералічылі грошы і заявілі, што яна парушыла парадак дэкларавання. На жанчыну склалі пратакол пра адміністрацыйнае правапарушэнне па ч. 2 арт.15.5 КаАП пра недэклараванне грашовых сродкаў. А самі грошы забралі.
Перайшла рысу
Суд адбыўся праз месяц, 28 сакавіка, сама замежніца на яго не прыехала — яе прадстаўляў адвакат. Паводле тлумачэнняў жанчыны, яна не ведала парадку дэкларавання, але зусім не хавала, што вязе грошы, і добраахвотна іх паказала. Пры гэтым яна падпісала пратакол і пагадзілася з правапарушэннем.
Мытнікі ж на судзе заявілі, што, ступіўшы за лінію зялёнага калідора, украінка фактычна заявіла пра адсутнасць тавараў і грошай, якія падлягаюць дэклараванню. Да гэтага моманту ў яе быў час азнаёміцца з інфармацыйнымі стэндамі на мытным посце, дзе расказваецца пра парадак дэкларавання, таксама яна мела магчымасць да ўваходу на зялёны калідор звярнуцца з пытаннем да супрацоўніка мытні, але нічога з гэтага жанчына не зрабіла. А значыць, у яе правапарушэнні няма ніякіх сумневаў.
У супрацоўнікаў мытні быў нават відэазапіс, на якім запісанае парушэнне. Але відэафайлы на дыску папросту не адкрыліся, і на судзе іх ніхто не ўбачыў. Аднак перашкодай для суддзі гэта не стала. Акрамя таго, адвакатка прадставіла дамовы куплі-продажу як пацверджанне паходжання грошай жанчыны, але гэта не адыграла ніякай ролі.
Без канфіскацыі? З канфіскацыяй
«Нормы закона падчас перамяшчэння праз мытную мяжу грашовых сродкаў не выкананыя, хоць пры неабходнай уважлівасці і прадбачлівасці яна мусіла і магла прадбачыць магчымасць наступлення шкодных наступстваў іх невыканання», — адзначаецца ў пастанове.
Суд прыйшоў да высновы, што ўкраінка вінаватая ў інкрымінаваным ёй правапарушэнні. І нават нібыта прадэманстраваў гуманнасць — прызначыў ёй мінімальны штраф у памеры пяці базавых велічынь, або 200 рублёў.
Але нягледзячы на тое, што ч. 2 арт. 15.5 КаАП прадугледжвае магчымасць пакарання ў выглядзе штрафу як з канфіскацыяй незадэклараваных сродкаў, так і без канфіскацыі, у гэтым выпадку (як і практычна ва ўсіх такіх выпадках) беларускі суд пастанавіў канфіскаваць усю канфіскаваную суму. Украінка страціла больш чым 26 000 даляраў — усе зберажэнні яе сям'і.
Чытайце таксама
