Прарасійская прапагандыстка Вольга Бондарава паспрабавала праз Мінгарвыканкам дабіцца перайменавання сталічнай вуліцы Каліноўскага ў вуліцу Мядзведзя, але яе прапанову ўспрынялі без энтузіязму і патлумачылі, што на гэта спатрэбяцца значныя сродкі. Актывістка падзялілася сваім абурэннем у сацсетках.
Бондарава і яе аднадумцы адправілі ў Мінгарвыканкам калектыўны зварот пра перайменаванне мінскай вуліцы Каліноўскага ў гонар Аляксандра Мядзведзя — беларускага барца вольнага стылю і трохразовага алімпійскага чэмпіёна.
Ім прыйшоў адказ за подпісам начальніцы ўпраўлення культуры Мінгарвыканкама Кацярыны Лучыной — там гаворыцца, што прапанова будзе вывучаная на паседжанні камісіі па найменні і перайменаванні праспектаў, вуліц, плошчаў і іншых складовых частак Мінска.
«Звяртаем увагу, што пры перайменаванні любой са складовых частак Мінска спатрэбіцца ўнясенне змяненняў у рэгістрацыйныя дакументы грамадзян і юрыдычных асобаў, а таксама ў элементы візуальнага арыентавання, на што неабходныя значныя фінансавыя выдаткі», — сказана ў дакуменце.
Чыноўніца нагадала і пра тое, што падчас перайменавання гарадскіх вуліц «асобна ўлічваюцца меркаванні жыхароў, якія жывуць на гэтых вуліцах», — то-бок аднаго толькі пажадання Бондаравай і яе паплечнікаў недастаткова.
Прапагандыстка, мяркуючы з усяго, чакала неадкладнага ўхвалення сваёй ініцыятывы, і яе здзівіла, што гарадскія ўлады «раптам заклапаціліся коштамі шыльды і заменай дакументаў». Бондарава ўпэўненая, што ў Мінгарвыканкаме проста «знайшлі нагоду» не прыбіраць са сталічнай тапанімікі імя Каліноўскага — сама актывістка назвала гэтага дзеяча «злыднем».
«Сорамна. Каму служыш, культурка?» — рэзюмавала яна.
Як прарасійская прапаганда спрабуе «сцерці» вуліцу Каліноўскага
Зварот Бондаравай — не першая спроба дабіцца перайменавання сталічнай вуліцы Каліноўскага. Так, вясной прарасійская арганізацыя «Движение Союз» ужо скіравала зварот у беларускі парламент і Мінскі гарсавет дэпутатаў з прапановай перайменаваць яе ў вуліцу 17 верасня.
Старшыня гэтай грамадскай структуры Сяргей Лушч расказаў, што «апошняй падзеяй, якая канчаткова падштурхнула выступіць з дадзеным зваротам, стала перайменаванне ў Адэсе вуліцы Беларускай у вуліцу Каліноўскага».
Каментуючы ініцыятыву, Лушч падзяліўся сваімі памылковымі меркаваннямі пра Кастуся Каліноўскага, заявіўшы, што ён «не з’яўляецца ніякім народным змагаром за свабоду Беларусі».
Яшчэ раней ідэю перайменавання вуліцы Каліноўскага ў Мінску агучыў прапагандыст Рыгор Азаронак. У адказ на перайменаванне ў Адэсе вуліцы Беларускай ён заявіў, што «прыйшоў час сіметрычных крокаў». Яго падтрымаў такі ж часты госць расійскіх прапагандысцкіх шоу Вадзім Гігін:
«Над назвай думаем. Мяркую, трэба будзе шырока прыцягнуць грамадскасць», — напісаў прапагандыст у сваім тэлеграм-канале.
Нагадаем, беларускія прапагандысты не першы год вядуць вайну супраць лідара паўстання 1863 года, называючы яго «польскім тэрарыстам». Раней мы падрабязна расказвалі, чаму гэта здарылася, чым вядомы гэты рэвалюцыянер і чаму ён па праве ёсць нацыянальным героем нашай краіны.
Чытайце таксама
