Крэмль збіраецца працягваць вайну ва Украіне да 2026 года. У яго планах — захоп Харкава і Дняпра. Пра гэта напісаў ваенны аналітык BILD Юліян Рэпке са спасылкай на звесткі, перададзеныя крыніцамі ў разведцы.
Паводле гэтай інфармацыі, улады РФ разлічваюць, што Захад знізіць падтрымку Украіны, а таксама спадзяюцца на імітацыю перамоваў, каб увесці сусветную супольнасць у зман адносна «мірных намераў» Расіі. Насамрэч у Крамлі не плануюць ніякага перамір'я і распрацоўваюць новы сярэднетэрміновы план вайны, сцвярджаюць крыніцы.
- Расійскія ўлады плануюць да канца 2024 года ўсталяваць поўны кантроль над Данецкай і Луганскай абласцямі і дайсці да ракі Аскол у Харкаўскай вобласці.
- Да канца 2026 года плануюць наступаць далей на захад да Дняпра, захапіўшы значную частку Запарожскай, Днепрапятроўскай і Харкаўскай абласцей, у тым ліку гарады Харкаў, Днепр і Запарожжа.
- На Херсонскім фронце збіраюцца ўтрымліваць абарону па Дняпры, не наступаючы на правы бераг на Херсон ці Адэсу.
«Усе ўсходнія тэрыторыі лявей Дняпра мусяць быць заваяваныя цягам 36 месяцаў, — заявіла крыніца. — Тады рака стане новым фронтам». Паводле звестак нямецкай разведкі, улады РФ гатовыя штогод страчваць ва Украіне да 100 000 салдат.
Пра тое, што максімалісцкія мэты Расіі ўключаюць кантроль над усімі чатырма абласцямі Украіны, часткі якіх яна незаконна анексавала, пісаў амерыканскі Інстытут па вывучэнні вайны. Такая капітуляцыя непрымальная з пункту гледжання жыццёва важных інтарэсаў нацыянальнай бяспекі як Украіны, так і Захаду, падкрэслівалі ў ISW.
Вайна ва Украіне ўжо абышлася Расіі ў 315 000 забітых і параненых вайскоўцаў, або амаль 90% асабовага складу, які яна мела на момант пачатку канфлікту. Страты Масквы ў асабовым складзе і бранятэхніцы, нанесеныя ўкраінскімі вайскоўцамі, адкінулі расійскую вайсковую мадэрнізацыю на 18 гадоў назад, паведамляла агенцтва Reuters са спасылкай на звесткі амерыканскай разведкі.
