Паўночная Карэя адкрые мяжу для замежных турыстаў у снежні, паведаміла турыстычная кампанія Koryo Tours, якая базуецца ў сталіцы Кітая Пекіне, — «лідар па арганізацыі падарожжаў у Паўночную Карэю з 1993 года».
Паводле інфармацыі Koryo Tours, да канца года стане зноў магчымае наведванне турыстамі горада Самчжыен ля мяжы з Кітаем.
«Мы атрымалі пацверджанне ад нашага мясцовага партнёра, што турызм у Самджыене і, магчыма, у астатняй частцы краіны афіцыйна адновіцца ў снежні 2024 года. Кампанія Koryo Tours чакала гэтай абвесткі больш за чатыры гады і нецярпліва чакае аднаўлення турызму ў Паўночнай Карэі», — гаворыцца ў паведамленні Koryo Tours.
Такі крок — прыкмета таго, што закрытая краіна рыхтуецца зноў адкрыць межы для вялікіх груп замежных турыстаў пасля многіх гадоў строгага памежнага кантролю праз COVID-19, піша Reuters.
Міжнародныя рэйсы ў Паўночную Карэю і з яе аднавіліся летась, а невялікая група расійскіх турыстаў вылецела ў Паўночную Карэю ў межах прыватнага тура ў лютым. Аднак з 2020 года Паўночная Карэя не была цалкам адкрытая для замежных турыстаў.
Нагадаем, у канцы ліпеня КНДР наведваў кіраўнік МЗС Беларусі Максім Рыжанкоў. Ён абмеркаваў пытанні паставак беларускіх прадуктаў харчавання, перш за ўсё сухога малака і мяса, і адзначыў «вялікую цікавасць да дзіцячага харчавання».
Акрамя таго, у КНДР цяпер будуюць турыстычную зону з чатырохкіламетровым пясчаным пляжам і блізкім аэрапортам. Тэарэтычна туды могуць трапіць і беларусы.
