Прэзідэнт ЗША Дональд Трамп у інтэрв'ю тэлеканалу NBC News заявіў, што дзякуючы яго ўмяшанню Расіі давядзецца адмовіцца ад планаў заваяваць усю Украіну. Так ён адказаў на пытанне журналісткі пра тое, на якія саступкі пойдзе Расія ў сітуацыі, калі ад Украіны патрабуюць адмовіцца ад часткі сваіх земляў.
— Расіі давядзецца адмовіцца ад усёй Украіны. Бо Расія хоча ўсю Украіну. І калі б я не ўмяшаўся, яны б цяпер змагаліся за ўсю Украіну. Расіі не патрэбны той кавалак, які ў іх ёсць цяпер; Расіі патрэбная ўся Украіна. І калі б не я, яны б працягвалі, — заявіў Трамп у адказ на пытанне.
Паводле прэзідэнта ЗША, лідары Еўрасаюза шмат разоў прасілі яго патэлефанаваць Пуціну, бо на іх званкі той не адказваў.
— Я магу сказаць вам наступнае: Ён (Пуцін) — яго амбіцыі былі спыненыя ў значнай ступені, калі ён убачыў, што цяпер я ўсё гэта ўзначальваю. Паколькі ён не меў справы ні з кім у Еўропе, ён не ператэлефаноўваў ім, — заявіў Трамп.
Ён зноў раскрытыкаваў свайго папярэдніка Джо Байдэна, назваўшы яго вінаватым у пачатку вайны, заявіўшы пры гэтым, што ўсе чатыры гады свайго першага тэрміну сачыў, каб Пуцін не развязаў канфлікт.
Што да яго пагрозаў выйсці з працэсу перамоваў, то Трамп не стаў гаварыць канкрэтна, пры якіх умовах ён пойдзе на гэта. Пры гэтым адзначыў, што часам блізкі да такога кроку, але адбываюцца пазітыўныя рэчы, якія зноў прымушаюць паверыць у поспех перамоваў.
— Мы хочам мірнага пагаднення. Мы хочам, каб Расія і Украіна пайшлі на пагадненне. Мы думаем, што мы даволі блізкія да гэтага, і мы збіраемся выратаваць шмат людзей ад гібелі. Мы збіраемся зэканоміць таксама шмат грошай.
Трамп таксама заявіў, што «мы бліжэйшыя» да пагаднення з аднаго з бакоў, і, «магчыма, не такія блізкія з другога. Але паглядзім. Я б не хацеў казаць, да якога з іх мы бліжэйшыя».
— Калі вы сапраўды сыдзеце (з перамоваў), ці будзе гэта азначаць, што вы спыніце абмен ваеннымі і разведвальнымі звесткамі? — пацікавілася журналістка.
— Я не хачу цяпер пра гэта казаць. Яшчэ зарана пра гэта казаць, — адказаў Трамп.
Нагадаем, у сярэдзіне красавіка Трамп прадставіў свой мірны план па Украіне. Згодна з дакументам, ЗША гатовыя афіцыйна прызнаць расійскім анексаваны ў 2014 годзе Крым, зняць частку санкцый і адмовіцца ад планаў прыняць Украіну ў NATO. Таксама ў Вашынгтоне згодныя з тым, што Масква захавае фактычны кантроль над 20% украінскай тэрыторыі, якую ўдалося захапіць з пачатку ўварвання.
У Еўрасаюзе назвалі чырвонымі лініямі патрабаванне Трампа да Украіны прызнаць Крым расійскім і адмовіцца ад уступлення ў NATO.
Пры гэтым Украіна гатовая часова саступіць Расіі захопленыя тэрыторыі, але не стане прызнаваць гэта юрыдычна, а будзе дамагацца іх вяртання дыпламатычным шляхам, заяўляў раней прэзідэнт краіны Уладзімір Зяленскі.
