Восем краін, якія не ўваходзяць у Еўрасаюз, падтрымалі нядаўнія санкцыі ЕС у дачыненні да афіцыйнага Мінска. Пра гэта заявілі 14 студзеня ў Радзе ЕС.
Да абмежаванняў далучыліся Албанія, Боснія і Герцагавіна, Ісландыя, Ліхтэнштэйн, Чарнагорыя, Паўночная Македонія, Нарвегія і Украіна. Паведамляецца, што яны забяспечаць «адпаведнасць сваёй нацыянальнай палітыкі» санкцыйнаму рэжыму ў дачыненні да афіцыйнага Мінска.
У сваю чаргу ЕС «прымае да ведама гэтае абавязанне і вітае яго».
Нагадаем, Еўрасаюз 16 снежня 2024 года увёў санкцыі ў дачыненні да 26 чалавек і дзвюх кампаній з Беларусі «ў сувязі з сітуацыяй у краіне».
У спіс трапілі суддзі, якія выносілі палітычна матываваныя прысуды, кіраўнікі некалькіх папраўчых установаў (калоніі № 13 у Глыбокім, калоніі № 9 у Горках, СІЗА № 1 у Мінску) і іх намеснікі, кіраўнік медчасткі турмы № 1 у Гародні. Таксама пад санкцыі трапіў старшыня Беларускай рэспубліканскай калегіі адвакатаў Аляксей Швакаў.
Таксама ў пераліку асобы, «якія, будучы ўладальнікамі бізнесу, суўладальнікамі, партнёрамі ці чальцамі радаў дырэктараў, здабывалі выгаду ад рэжыму Лукашэнкі, у тым ліку праз прывілеі ці перавагі, дадзеныя іх кампаніям рэжымам, і спрыялі абыходу санкцый ЕС».
У ліку такіх бізнесоўцаў — Ігар Субоцін, Андрэй Свірыдаў, новы гендырэктар «Беларуськалія» Андрэй Рыбакоў.
Дзве кампаніі, у дачыненні да якіх увялі абмежаванні, — гэта ТАА «Влате Логистик» (лагістычны аператар, які валодае транспартна-лагістычнымі цэнтрамі «Брузгі» і «Бераставіца» на мяжы з Польшчай) і ТАА «Рузэкспедыцыя».